من قلب سورية... سلام لفيروز
من قلب سورية... سلام لفيروز... مارح نحكي عن حدا غريب عنا نحنا السوريين رح نحكي عن انسانة بتحسا وحدة من العيلة السورية ، متل مافي بكل بيت أب أم وإخوات في كمان فيروز وصوت فيروز هاد الصوت اللي بيطلع الصبح من قلب بيوتنا من التلفزيون من الإذاعات صار روح عم تشاركنا تفاصيل حياتنا الصباحية واليومية بتلف ع كل المحطات والإذاعات اللي بالبلد الكل دون استثناء صوت واحد هو صوت سفيرتنا للنجوم بتحتار شو تختار ع أي محطة ع أي إذاعة رح توقف الموجة أي أغنية رح تسمع، " طريق النحل " اللي بتتوقع يمكن يختارها أي شخص ع طريق سفر أو " سلملي عليه " اللي ممكن تختارها أي صبية لحبيبها أو أي أم اشتاقت لإبنها اللي واقف بمكان ما ع أرض الوطن بعيد عن حضنها بسبب هالحرب القاسية اللي عايشينا أو يمكن " رجعت الشتوية " الخيار الأول لكل سوري بعد أول مطرة من بعد صيف حار خيارات كتير وأغاني وألحان كتير كلها بصوت " عرابة السلام " وشو بدنا نقول و أي أغنية منسمع كل الأغاني عايشينا حتى لو ماعايشينا حتى لو اسمعت وحدن واستحضرت الذكرى والحالة الإنسانية اللي خلقت من وراها هالتحفة الفنية واتأثرت فيه